Kvíslatunguvirkjun – Vettvangsskoðun

FYRIR VÆNTANLEGT ÚTBOÐ MANNVIRKJAGERÐAR Kvíslatunguvirkjun – Útboð mannvirkjagerðar Orkubú Vestfjarða ohf. undirbýr útboð vegna mannvirkjagerðar Kvíslatunguvirkjunar í Selárdal í Steingrímsfirði. Gert er ráð fyrir að útboðsgögn verði birt um miðjan október 2026 og að framkvæmdir standi yfir á árunum 2027–2029. Vegna árstíma og veðuraðstæðna á framkvæmdasvæðinu er áhugasömum verktökum boðið til vettvangsskoðunar áður en útboðsgögn verða birt. Lauslegt yfirlit yfir verkið Kvíslatunguvirkjun verður 9,9 MW vatnsaflsvirkjun, staðsett í Selárdal í Steingrímsfirði, u.þ.b. 20 km frá Hólmavík. Aðkoma að vinnusvæðinu er frá Djúpvegi (61) um Strandaveg (643) að Geirmundarstaðavegi (6433) og loks eftir nýgerðum aðkomuvegi að væntanlegu stöðvarhúsi, Kvíslatunguvegur. Rétt fyrir sunnan væntanlegt stöðvarhús liggur 5 km nýr vegur upp Leitishlíðina að staðsetningu fyrirhugaðs inntakshúss. Sá vegur er enn í byggingu. Helstu magntölur í væntanlegu útboði eru Gröftur 370.000m³ Stíflufyllingar 380.000m³ Járnbending 140.000kg Steinsteypa 1.550m³ Forsteyptar einingar 340m² Niðurlögn þrýstipípu, ø1000 – 1400mm 3.000m Efnisnámur Ekki er talið að heppilegt efni til steypugerðar sé að finna á framkvæmdasvæðinu. Verktaki þarf því að gera ráð fyrir að útvega efni til steypugerðar annars staðar frá. Leyfismál Virkjunarleyfi hefur verið gefið út. Framkvæmdaleyfi liggur hins vegar ekki fyrir þar sem unnið er að breytingum á aðal- og deiliskipulagi í kjölfar jarðvegsrannsókna sumarið 2026. Gert er ráð fyrir að framkvæmdaleyfi verði veitt á fyrsta ársfjórðungi 2027. Vettvangsskoðun Orkubú Vestfjarða ohf. býður áhugasömum verktökum til vettvangsskoðunar á fyrirhuguðu framkvæmdasvæði. Stefnt er að því að vettvangsskoðunin fari fram 8. eða 9. október 2026 kl. 12:00 , eftir því hvor dagurinn hentar betur með hliðsjón af veðri og aðstæðum á svæðinu. Ef veður eða aðstæður leyfa ekki vettvangsskoðun þessa daga kann henni að verða frestað fram yfir helgi. Þeir sem hyggjast taka þátt í vettvangsskoðun skulu tilkynna þátttöku með tölvupósti á netfangið jbh@verkis.is eigi síðar en 7. október 2026 . Skráðir þátttakendur verða upplýstir um endanlega dagsetningu og mætingarstað þegar nær dregur, með hliðsjón af veðurspá og aðstæðum á svæðinu. Vegna aðstæðna á svæðinu er nauðsynlegt að þátttakendur séu á vel útbúnum breyttum jeppum á a.m.k. 35″ dekkjum eða sexhjólum. Yfirlitskort af framkvæmdasvæðinu og frekari upplýsingar verða aðgengilegar á útboðsvef Orkubús Vestfjarða: https://in-tendhost.co.uk/orkubu/ Athygli er vakin á að þessi kynning og vettvangsskoðun felur ekki í sér formlega útboðsauglýsingu og þátttaka í vettvangsskoðun er ekki skilyrði fyrir þátttöku í hinu fyrirhugaða útboði. Allar upplýsingar sem kunna að hafa þýðingu fyrir gerð tilboða verða veittar öllum bjóðendum með sama hætti í tengslum við hið formlega útboðsferli. Reynist vettvangsaðgangur nauðsynlegur til að unnt sé að gera tilboð verður öllum bjóðendum tryggður sambærilegur aðgangur að framkvæmdasvæðinu.